هل من الضروري ان أنزع البطارية من الاب توب إذا شغلته على الكهرباء العادية ؟؟؟

تاريخ التسجيل : 01/01/1970

أقدر أشبك سلك الشاحن والبطارية موجوده في الجهاز؟!
[ندعوك للتسجيل في المنتدى أو التعريف بنفسك لمعاينة هذا الرابط]

نعم تقدر .. لأن بطارية الليثيوم في تصميمها الداخلي يوجد فيها
حساس وشغلته إنه يفصل الكهرباء عن البطاريه إذا اكتمل شحنها!.

الحساس في البطاريه زي الغطاء للعلبه ، تخيل لو عندك علبه
وتعبيها مويه مثلاً ، الطبيعي إنه إذا امتلت بتوقف وبتغلقها بواسطة
الغطاء ، لكن لو مافيه غطاء واستمريت تعبي وتعبي؟! الحاصل إن
الماء بيزيد ويفيض عن العلبه وهذا اللي يصير مع البطاريه ،
لو إن الحساس غير موجود ( الغطاء) والبطاريه قاعده تتعبى
من سلك الشاحن ( المويه ) اللي بيصير إن الشحن بيزيد وبتزيد
حرارة البطاريه لأنها اخذت طاقه أكبر من قدرتها وبالتالي ستنفجر !

لكن في بطارياتنا الحين ودام الحساس يعمل بشكل صحيح ، فيمكنك
وضع البطاريه وسلك الشاحن سوا في الجهاز لأن الحساس تلقائيا إذا
وصل شحن البطاريه 100% بيفصل عنها الكهرباء ، والجهاز في
هذه الحاله بيستهلك شحن من السلك وكأن البطاريه غير موجوده !
يعني البطارية وسلك الشاحن متفاهمين سوا لا تشيل همهم

طيب هل شحن البطارية وهي لم تفرغ بعد يؤدي إلى إتلافها؟!

الكلام هذا صحيح لكن في بطاريات النيكل فقط! ، لكن بطاريات الليثيوم
مختلفه وتقدر تستخدمها بدون ضمير ، تقدر تشبك الشاحن والبطارية
فيها مثلاً 40% يعني وقت مافضت ، للتوضيح أكثر ناخذ مثال سريع :
دلوقتى إذا جيت تطلع مشوار طويل ، وبطارية جوالك ليس فيها إلا النصف
بس بطبيعة الحال واللي نسويه كلنا إننا نكمل شحنها ، ونلاحظ إن بطارية
الجوال ممتازه وعمرها طويل ، مع إننا نعمل هذه الحركه ولا ننتظر البطارية
تفضى ! ، بطارية اللاب توب - ولأنها نفس نوع الجوال " ليثيوم " - تقدر
تعمل فيها نفس الشي ، وتشحنها وهي لسه مافضت بعكس النيكل اللي
تخرب لو شحنتها شحن جزئي .

هل صحيح إني لو أشيل البطارية وأشتغل على سلك الشاحن أفضل لجهازي؟!

هذا صحيح قديماً في النيكل .. لكن الليثيوم ماينفع إنك تشيلها فتره طويله
لأن هذا الشي يضرها ويقلل من عمر الاستهلاك اليومي لها .. مثلاً
لو عندك ورده ( للأسف وصلت هالمرحله من التشبيهات هههههههههه)
عندك ورده في حديقه .. ولا أسقيتها منذ فتره من الزمن .. تتوقع إن
الورده بتعيش؟! .. طبعاً لا ( معلومة جديدة الصراحه ) ، وبطارية
الليثيوم نفس الشي .. إذا قعدت فتره بدون شحن (شحن= ماء) بينخفض أدائها بشكل كبير!

وهذا يقودنا لنقطه مهمه وهي عمر البطارية !
البطاريه لها عمرين : العمر الافتراضي + الاستهلاك اليومي ..
الاستهلاك اليومي : وهو الوقت اللي تقضيه يومياً في استهلاك البطارية
فيه ناس تقعد بطاريتهم 3 ساعات وفيه ساعتين وسبب هذا الاختلاف
بنعرفه فيما بعدين

العمر الافتراضي : وهو عمر البطاريه منذ تاريخ إنتاجها إلى انتهائها
وهذا له عمر محدد ولا له علاقه أبداً بطريقة استخدامك لها والعمر هذا
غالباً يكون 3 سنوات .

وفيه ناس تتوقع إنها لو شالت البطاريه من الجهاز ولا استخدمتها
بيطول عمرها الافتراضي .. طبعا هالشي خطأ .. وللتوضيح ناخذ مثال
هالحين اللبن لو شريته ( ياشين اللي يكتب موضوع حزة تقليط الغداء)
اللبن شريته اليوم مثلاً .. وتاريخ إنتهائه بعد أسبوع .. ولنفترض إنك
حطيته في الثلاجه وهو جديد .. ومر أسبوع وإنت ما أستخدمته أبداً ..
هل تعتقد إن اللبن موب منتهي وبيبقى صالح للاستخدام عشانك مافتحته؟!
طبعاً لا .. هو له تاريخ محدد ينتهي فيه بغض النظر إنت استخدمته أو لا ..
بطارية الليثيوم زي كذا برضه .. تموت بعد تاريخ إنتهائها .. لذلك انتبه
لتاريخ الإنتاج إذا جيت تشتري بطارية جديده .

الزبده إنك مستحيل تطيل العمر الافتراضي لكنك تقدر تزيد عمر الاستهلاك
اليومي وهذا اللي عليه العلم

طيب كيف أزيد الاستهلاك اليومي؟!

طبعاً البطاريه في تركيبها الداخلي تحتوي على خلايا cells وكلما زاد عدد الخلايا
زاد عمر الاستهلاك اليومي .. يعني نسمع إن بطاريات تقعد ساعتين وبطاريات
ست ساعات هذا كله سببه عدد الخلايا .. وعدد الخلايا في البطاريات أنواع :
4 خلايا - 6 خلايا - 8 خلايا .
وأكيد كل مازاد عدد الخلايا كل مازاد سعر البطاريه + أدائها .
وتقدر تطلب البطاريه بـ 8 خلايا من وكيل الشركه اللي شاري منهم جهازك .